TAKICUAH

TAKICUAH

By: Fitriyani

            Jupri galak-galak sambia mancaliak hape. Antah apo nan dicaliaknyo, sahinggo inyo sampai galak-galak surang. Urang nan maimbau inyo pun ndak di acuahkan. Kalau di patuik-patuik, alah sabulan lamonyo Jupri bantuak urang gilo. Tibo-tibo urang nan biaso di panggia si Jup ko mangecek ka amaknyo “Mak, Jupri ka babini!”

            Si Jup ko adolah bujang nan baumua 38 taun. Inyo bakarajo sabagai toke karupuak. Di angkatan kawan samo gadang jo inyo, hanyo si Jup nan alun babini. Nan kawannyo alah ka masuak SD pulo anaknyo, nan si Jup masih jo alun basuo jo jodohnyo. Alah banyak urang nan manolongan Jupri mancari bini, tapi indak ado nan sasuai jo inyo. Antah inyo nan banyak piliah antah baa. Kini di umua nan lah patuik babini ko, inyo hanyo bisa pasrah manarimo sampai ado urang nan nio jo inyo.

            Kini Jupri sadang dakek jo padusi, padusi tu acok ma-hape ka Jupri, Jupri tu takah tu pulo, acok ma-hape ka padusi tu. Jupri yakin kalau urang tu adolah jodohnyo.

“Mak, Jupri ka babini lai mak, bisuak calon Jupri datang ka rumah kito pai maminang” kecek Jupri ka amaknyo.

“Baa lo dek calon ang nan datang ka mari pai maminang eh? Ndak kito nan ka pai manjalang ka situ?” jawek amaknyo heran.

“Indak mak, inyo urang Batipuah, adat di sinan urang padusi nan maminang nan laki-laki. Jadi inyo ka kamari bisuak, mancaliak sambia maminang Jupri, Mak! Kini amak pai lah ka pasa, bali apo nan ka dibali untuak mananti urang dari Batipuah bisuak” kecek si Jupri ka amaknyo jo sanang hati. Mandanga kato nan damikian, iyo pulo lah kato amaknyo, langsuang lah amaknyo bagageh ka pasa.

Lah baliak dari pasa, dibukak pambalian dari pasa tadi. Di imbau urang untuak ka manolongan mamasak. Kini lah rami urang di rumah si Jupri, ado nan sadang manggiliang lado, mangubak bawang, mambarasiahan ayam, sado karajo ditolongan dek urang di kampuang si Jupri. Urang pun ikuik marasoan sanang mandanga si Jupri ka babini.

Hari nan di nanti lah tibo, hari di mano calon si Jupri datang ka rumah. Indak saba hati si Jupri ka basuo jo calon nyo tu. Baju rancak lah takanak, hidangan di rumah lah siap pulo, nan hape indak pernah lupo di baoknyo.

Kini hari lah lewat tangah hari, kiro-kiro jam duo. Jupri jo saba hati taruih mananti calonnyo tibo di rumah. Tiok sabanta mancaliak hape, mananti kaba dari calonnyo. Jam taruih baputa, kini lah manunjuak an jam satangah anam, lah dakek malam, tapi nan di nanti tak kunjuang tibo.

“Jup, ma calon ang dek alun jo tibo lai?” tanyo amaknyo.

“Masih di jalan, Mak” jawek si Jupri.

“Lamo e lai mang, dari tadi kito mananti lai, indak jo tibo-tibo urang tu do, iyo lai kini urang tu ka datang?”

“Iyo, saba lah amak dulu” jawek Jupri singkek.

“Lai ndak dipaulahan e jo waang dek e mang? Dima ang basuo jo inyo dulu?” tanyo amaknyo baliak.

Jupri indak manjawek, inyo diam sajo.

“Oi, indak tadanga dek waang den batanyo, dima ang basuo jo inyo dulu?”

“Jupri lun ado basuo jo inyo lai mak, hari kini ko Jupri ka basuo jo inyo baru” kecek si Jupri.

“Onde nak, jadi salamo ko ang tau di hape jo e? Ndak ko lai do, indak ka datang-datang bagai inyo ka rumah kito do. Lah di kicuah e ang dek nyo mah Jup”

“Lai mak, lai ka tibo inyo raso Jupri e mak” Jupri mayakinkan amak nyo.

“Cubo lah ang talepon inyo daulu, ang iduik an sipiker hape ang tu, kito danga basamo-samo”

Jupri sakutiko langsuang maiduikan hapenyo, manalepon nomor nan ka calonnyo. Alah babunyi dariang hape, ado tadanga suaro padusi di dalam talepon. “Assalamualaikum, da. Ina masih dijalan da, tadi macet, ban oto bocor pulo, makonyo lambek kami sampai ka situ da”

“iyolah diak, uda tunggu” jawek si Jupri. “Lai tadanga dek amak, inyo lai ka tibo nyo, kito tunggu sabanta lai”

Samantaro itu, Yanti, urang nan tingga di subalah rumah si Jupri, curiga ka Iyet, bini adiak laki-laki Jupri. Yanti curiga kalau urang nan salamo iko ma-hape jo si Jupri adolah Iyet. Baa dek mode itu, karano satiok si Jupri mamatiak hape, si Iyet mamatiak hape pulo, si Jupri manalepon, si Iyet manalepon pulo sambia maandok-andok. Di hari calon si Jupri ko ka datang, si Iyet acok mailang di tangah-tangah urang nan rami. Dek sabana curiganyo, wakatu si Jupri manalepon calonnyo di muko amaknyo jo urang rami, si Yanti langsuang maikuik an si Iyet dari balakang, inyo mandanga si Iyet manalepon, mangecek kalau inyo lai ka datang, tapi macet di jalan, ban oto bocor pulo. Samo kato-kato si Iyet ko jo calon si Jupri ko pas manalepon. Katiko si Iyet salasai manalepon, Yanti langsuang datang dari balakang, maambiak hape si Iyet, inyo langsuang balari masuak ka dalam rumah si Jupri, tibo di dalam rumah, langsuang di mintaknyo hape si Jupri.

“Jup, salang hape ang, den ka manalepon urang”

“Capek kau yo, jan lamo-lamo pulo, beko sibuk lo hape den pas inyo manalepon”

“sabanta den pakai hape ang nyo mang”

Sasudah Yanti manyalang hape si Jupri, di caliak lah dek si Yanti isi hape Jupri, di talepon dek si Yanti nomor nan calon Jupri dari catatan panggilan kaluanyo. Sasudah dipastian, kironyo nomor calon si jupri tadi langsuang manyambuang ka hape Iyet. Sakutiko tacangang urang di dalam rumah si Jupri.

“Ndak salah den salamo ko do, kironyo urang nan acok mahape si Jup ko adolah si Yet. Oi yet, baa kok sampai hati kau mampaulahan si Jup? Jup, ang caliak ko ha, urang nan ma-hape jo ang salamo ko si Yet. Ang caliak lah isi hapenyo ko a” Yanti langsuang mambukak coki si Iyet di muko urang rami. Jupri langsuang mancaliak hape si Iyet, sasudah di caliak di pareso, langsuang tamanuang panjang rauik muko si Jupri. indak tau kama muko ka disuruak an. Ka berang, nan awak salah pulo, pacayo sajo jo urang nan dikenal di hape. Malu rasonyo pado hari itu, Jupri langsuan bajalan ka biliak. Sadangkan si Iyet, langsuang ditanyo-tanyo, apo sababnyo si Jupri di paulahan mode itu, si Iyet hanyo manjawek kalau inyo bagarah sajo. Indak ado mukasuik lain. Laki Iyet, adiak dari si Jupri, maraso kacewa, bangih, mancaliak kalakuan bininyo. Inyo langsuang manyuruah bininyo untuak pai dari kampuang tu dulu, sampai buah bibia nan ado dikampuang tu talupoan.